Mark 8

Jesus ne haangai ana gau e haa mana (4,000)

(Matthew 15.32-39)

1Digi duai, tuai hagabuulinga dangada dogologo gu dagabuli mai gi di gowaa e dahi, gu odi nadau meegai, gei Jesus ga gahi mai ana dama agoago gi dono baahi, ga helekai, 2“Au gu aloho i tagabuulinga dangada dogologo deenei, gu dolu nadau laangi i dogu baahi, gu nadau mee e gai dolomeenei ai. 3Maa au ga hagau digaula hiigai, gei digaula ga hagalibeina i di nadau hula, idimaa, hunu ginaadou ne loomoi loo haga mogowaa.” 4Ana dama agoago ga heeu, “Di anggowaa beenei le mee di gida nia meegai e dohu di haangai nia daangada huogodoo aanei?” 5Jesus ga heeu, “Nia palaawaa e hia i godou baahi?”

Digaula ga helekai, “Nia palaawaa e hidu.” 6Mee ga helekai gi tagabuulinga daangada gi noho gi lala. Gei mee ga dahi aga nia palaawaa e hidu, ga danggee gi God, ga ginigini, ga wanga gi ana dama agoago gi duwwaa gi digaula, gei ana dama agoago ga duwwe nia maa. 7Digaula nadau dama iga labelaa i golo, gei Jesus ga danggee i nia maa, ga helekai gi ana dama agoago gi duwwa ina labelaa gi digaula. 8Digaula ga miami, gu maaluu. Nia dama agoago ga haa nadau gada e hidu gu honu i nia meegai ala ne dubu. 9Holongo digaula huogodoo le e haa mana(4,000). Gei Jesus ga haga maaheu digaula. 10Di madagoaa hua deelaa, gei Jesus mo ana dama agoago ga kaga gi hongo di boodi, ga hula gi nia henua o Dalmanutha.

Nia Pharisee e dangi gi Jesus gi heia di mogobuna

(Matthew 15.32-39)

11Hunu Pharisee ne loomoi, ga hai nadau donu gi Jesus, e hiihai e haga hala a mee, ga helekai gi mee, “Heia dau mogobuna gi modongoohia bolo God la i doo baahi.” ^a 12Jesus ga dogi aga loo i ono lodo ga helekai, “Nia daangada dolomeenei, le e aha ala e hiihai gi di mogobuna? Goodou gi iloo, bolo di mogobuna e dugu ang gi di adu dangada dolomeenei ai.” ^b 13Mee ga hagatanga, ga hana i di boodi gi di baahi gi golo o di tai.

Nia agoago o nia Pharisee mo Herod

(Matthew 16.5-12)

14Nia dama agoago a maa gu de haawa di gaamai nadau palaawaa gi dohu, di palaawaa hua e-dahi dela i baahi digaula i hongo di boodi. 15Jesus ga helekai, “Goodou haga ligaliga i nia ‘yeast’ o nia Pharisee mo nia ‘yeast’ o Herod.” ^c 16Digaula ga leelee i nadau mehanga, “Mee e helekai beelaa, idimaa, gidaadou gu tadau palaawaa ai.” 17Jesus ga iloo nadau helekai, ga heeu, “Ma e aha goodou e helekai bolo goodou palaawaa ai? Goodou digi donu, gei digi iloo nia mee aanei? Goodou e noho boo godou lodo? 18Godou golomada i golo gei e dee gida? Godou dalinga i golo, gei e dee longono? Goodou gu de langahia ^d 19di madagoaa ne ginigini agu palaawaa e lima, ga duwwe gi digau e lima mana(5,000)? Nia gada e hia ala ne haa go goodou gi honu i nia mee ala ne dubu?”

Digaula ga helekai, “E madangaholu maa lua.” 20Gei Jesus ga heeu, “Di madagoaa ne ginigini agu palaawaa e hidu ang gi digau e haa mana(4,000), nia gada e hia ala ne haa go goodou gi honu i nia mee ala ne dubu?”

Gei digaula ga helekai, “E hidu.” 21Jesus ga heeu, “Malaa goodou digi donu beleiaha?”

Jesus e haga hili tangada deegida i Bethsaida

22Di nadau dau i Bethsaida, gei nia daangada ga laha mai di nadau dangada deegida gi Jesus, ga dangi gi mee, gi bili gi di nadau dangada. 23Jesus ga kumi di lima o maa, ga dagi gi daha mo di waahale. I muli di bui ana haawale gi nia golomada o maa, ga daahi ono lima gi hongo o mee, ga heeu, “Goe gu gidee?” 24Gei mee ga ala aga ga helekai, “Uaa, au gu gidee nia daangada, e hai be nia laagau e heehee.” 25Jesus ga dugu labelaa ono lima gi hongo nia golomada o maa. Gei mee ga mmada laa haga madammaa gi nia mee huogodoo. 26Jesus ga hagau a mee gi dono hale ga helekai gi mee, “Goe hudee hana labelaa laa lodo di waahale deelaa.”

Peter e haga modongoohia aga a Jesus

(Matthew 16.13-20; Luke 9.18-21)

27Gei Jesus mo ana dama agoago ga hula gi nia waahale e hoohoo gi Caesarea Philippi. I di nadau hula, gei Jesus ga heeu, “Hagia mai malaa, nia daangada le e helekai bolo au koai?” 28Gei digaula ga helekai, “Hunu gau e helekai goe go John Babdais, gei hunu gau e helekai goe go Elijah, hunu gau e helekai goe tangada i nia soukohp.” ^e 29Gei Jesus ga heeu, “Gei goodou bolo au koai?” ^f

Peter ga helekai, “Goe go di Mesaia.” 30Gei Jesus ga helekai bule gi digaula, “Goodou hudee hagi anga ina au gi nia daangada.”

Jesus e helekai i dono hagaduadua mo dono made

(Matthew 16.21-28; Luke 9.22-27)

31Jesus ga daamada ga agoago gi ana dama agoago, “Tama a Tangada le e hai loo gi hagaduadua, ge e haga balumee go nia dagi mmaadua, mo nia dagi aamua hai mee dabu, mo digau haga dondonu haganoho. Gei au e daaligi gi made, gei muli nia laangi e dolu, ga mouli aga.” 32Mee ga helekai haga mmaa gi modongoohia digaula. Peter ga lahi a mee gi mada ginaua, ga hai ono ngudu gi mee. 33Gei Jesus ga huli gi daha mo Peter, ga mmada gi ana dama agoago, ga haga donu adu Peter, “Tuu i-daha mo au, Satan. Au maanadu la hagalee mai baahi o God, nia hagamaanadu dangada dangada.” 34Gei Jesus ga haga dagabuli mai digau dogologo, mo ana dama agoago, ga helekai, “Maa tangada e hiihai e daudali au, ia gi haga balumee ia, aamo dono loobuu, daudali mai au. ^g 35Maa goe e hiihai e bida benebene doo mouli, gei goe ga de gidee doo mouli. Maa goe ga diiagi doo mouli i di au mo di Longo Humalia, goe ga gidee doo mouli. ^h 36Di humalia aha e gila adu gi di goe maa goe ga hai mee gi henuailala hagatau, gei e deemee di hai mee gi doo mouli donu? Hagalee! 37Ma di mee i golo e mada hagalabau i doo mouli ai! 38Tangada dela e langaadia i di au, mo agu agoago i baahi digau bouli ge huaidu dolomeenei, gei Tama Tangada le e langaadia ia labelaa i mee, i dono hanimoi i nia madamada o dono Damana, mo digau di langi haga madagu.”